Oc:GeoOccitania
| Tipe | Aplicacion web de contribucion |
|---|---|
| Domeni | Toponimia e cartografia collaborativa |
| Donadas escrichas | OpenStreetMap |
| Audios | GeoOccitania, CC BY 4.0 |
| Autenticacion | Còmpte OpenStreetMap, OAuth 2.0 |
| Lengas de documentacion | Occitan, francés, anglés |
| Responsable | P. Brechet — IEO, Institut d’Estudis Occitans |
| Estat | V1 |
GeoOccitania es un programa collaboratiu que permete de completar lei donadas occitanas d’OpenStreetMap e de recampar de prononciacions. Sa mapa resquilhanta carga ren que leis objèctes presents dins l’empresa visibla. Lei contribucions escrichas son mandadas directament a OpenStreetMap amb lo còmpte de cada contributor; leis audios son sauvats dins GeoOccitania e se mandan pas a OSM.
Lo programa es portat per P. Brechet — IEO, Institut d’Estudis Occitans.
Objectius
GeoOccitania facilita una cadena de contribucion completa:
- seleccionar d’objèctes OSM amb de requèstas Overpass;
- presentar lei tags dins un formulari amb de libellats occitans;
- mandar lei tags autorizats a OpenStreetMap;
- enregistrar ò depausar una prononciacion;
- sègre lei contribucions recentas;
- verificar leis audios;
- conservar una traça intèrna e exportar lei metadonadas.
La moderacion dei contribucions escrichas es a posteriori. Un verificator utiliza lo changeset, l’istoric OSM e leis aisinas OSM existentas per examinar una contribucion, contactar son autor ò senhalar una dificultat.
Prerequesits toponimics
La conoisséncia e l’aplicacion dei règlas toponimicas son de prerequesits. Lo contributor deu consultar:
- leis Règlas d’escritura de la Comission Toponimica Occitana;
- lei Règlas d’adaptacion dei noms pròpris.
Lei formas se devon verificar avant lo mandadís. GeoOccitania ajuda a emplir lei tags, mai remplaça pas lo trabalh lingüistic, la conoisséncia dau terren nimai lei bonas practicas de contribucion OSM.
Ròtles
Contributor
Tot utilizator que se connècta per premier còp amb OpenStreetMap recaup l’estatut contributor. Pòt:
- chausir un tèma;
- desplaçar e zoomar la mapa;
- seleccionar una balisa;
- completar lei camps autorizats;
- confirmar e mandar lei tags a OSM;
- enregistrar ò depausar un audio;
- mandar un messatge a l’administrator.
Verificator
Lo verificator accedís a l’espaci de verificacion. Pòt:
- sègre lei contribucions dau periòde definit per l’administrator;
- filtrar per tèma, contributor, objècte ò preséncia d’un audio;
- durbir lo changeset public;
- contactar un contributor amb la messatjariá OSM;
- escotar, validar ò escafar un audio;
- ajustar un audio que manca a una contribucion.
Administrator
L’administrator configura:
- lei tèmas e son òrdre alfabetic dins l’acuelh;
- lei balisas, sa forma, sa color e sa requèsta Overpass;
- lei nivèus de zoom e lo regropament deis icònas;
- lei camps, tags e valors fixas dei formularis;
- leis estatuts deis utilizators;
- lo periòde dei contribucions recentas.
Pòt tanben consultar lei messatges, exportar lei donadas e preparar una còpia de la basa.
Emplec
- Chausissètz un tèma. Lei tèmas actius son classats per òrdre alfabetic. Un contributor connectat pòt marcar sei favorits.
- Desplaçatz e zoomatz la mapa. GeoOccitania carga leis objèctes de l’empresa visibla, dins lei nivèus definits per lo tèma e lei balisas.
- Seleccionatz una balisa. Lo nom explica sa fonccion; sa forma e sa color permeton de destriar lei categorias.
- Completatz lei camps. Lei libellats son en occitan e lei noms tecnics dei tags OSM son afichats de costat. Lei valors fixas e escondudas son ajustadas automaticament.
- Mandatz l’escrich ò l’audio. Lo mandadís escrich actualiza OSM. Lo mandadís audio alimenta la basa audio de GeoOccitania.
Mapa, tèmas e balisas
Un tèma agropa una ò mai d’una balisa. Per exemple, un tèma dedicat ai transpòrts pòt destriar leis arrèsts sensa nom occitan deis arrèsts que tènon ja lo nom occitan. Un tèma dedicat ai linhas pòt agropar lei relacions de linha e de percors sensa cargar leis arrèsts.
Una balisa tèn :
- un nom fonccionau e una descripcion;
- una forma e una color;
- un zoom minim e un zoom maxim;
- un lindau de regropament;
- una requèsta Overpass QL;
- un formulari de tags OSM.
Lo nom e la requèsta determinan la fonccion de la balisa. I a pas de tipe predefinit « nom occitan » ò « pas de nom occitan »: aquela seleccion se fa entierament dins la requèsta.
Quand lo zoom es inferior ò egau au lindau configurat, leis icònas vesinas son agropadas. Un clic sus lo regropament agrandís la mapa e destria lei balisas.
Lei fons autorizadas dins la V1 son:
- lo fons OSM generic;
- lo fons OSM-oc fornit per OpenStreetMap França.
Lei donadas cartograficas son atribuidas ai contributors OpenStreetMap sota ODbL. Lo rendut OSM-oc es una jaça de mapa; modifica pas lei donadas OSM.
Requèstas Overpass
Cada requèsta activa deu contenir lo marcador {bbox}. GeoOccitania lo remplaça per l’empresa visibla. Exemple generic:
nwr
["name"]
({bbox});
out center;
La requèsta pòt seleccionar de nodes, ways e relacions, amb de tags positius ò negatius. Fau preparar e assajar la requèsta dins Overpass Turbo, remplaçar lei coordinadas per {bbox}, gardar puei lo rèsta sensa o modificar.
Overpass es un servici exterior. Una empresa tròp granda, un zoom tròp bas ò una requèsta tròp generala pòdon demandar tròp d’objèctes. Se lo servici s’encala, GeoOccitania assaja un còp de mai e prepausa un boton per relançar lo cargament. Una respònsa Overpass es una vista dei donadas OSM, pas una basa pròpria de GeoOccitania.
Formulari e tags OSM
Per cada tag dau formulari, l’administrator definís:
- lo nom tecnic OSM;
- lo libellat occitan;
- una valor completada ò vueja;
- sa visibilitat;
- son caractèr modificable ò non modificable;
- son caractèr obligatòri ò non obligatòri.
Una balisa deu contenir au mens un tag OSM valid.
GeoOccitania limita pas a priori lei tags possibles. L’administrator deu verificar que cada tag figure dins lo modèl OSM adaptat a l’objècte. Veire Map features, Multilingual names, Key:name e Key:source.
Mandadís a OpenStreetMap
La connexion emplega OAuth 2.0. GeoOccitania demanda lei permissions necessàrias per legir lo perfil OSM e modificar la mapa. Lo programa deu pas demandar una permission qu’emplega pas.
Per cada mandadís, lo servidor:
- verifica la session OSM e la configuracion activa;
- torna legir la version actuala de l’objècte;
- accepta ren que lei tags autorizats per la balisa;
- creá un changeset;
- actualiza l’objècte;
- plega lo changeset;
- enregistra la traça intèrna.
Lo contributor deu confirmar lei tags abans lo mandadís. Un objècte se pòt modificar per una autra persona entre la lectura e l’actualizacion. Dins aqueu cas, OSM pòt refusar la version; fau tornar cargar l’objècte abans d’assajar un còp de mai.
OpenStreetMap sauva l’autor, lo changeset e l’istoric dei tags. L’istoric public d’OpenStreetMap sègue lei règlas pròprias d’OSM.
Prononciacions
OSM prepausa pas de sauvament audio. GeoOccitania possedís doncas una basa e un espaci de fichièrs separats. Lo contributor pòt:
- enregistrar sa prononciacion amb lo microfòn;
- depausar un fichier dins un format acceptat;
- escotar l’enregistrament abans lo mandadís;
- mandar l’audio separadament de la contribucion escricha;
- escotar un audio validat, sensa escafar l’audio present.
Abans l’enregistrament, tres bips anoncian lo començament. La consigna prepausada es:
🙂 Per una votz pus naturala, fagues risolet abans de parlar.
Lo consentiment clar dau locutor es obligatòri:
Ai legit e consenti l’utilizacion e la difusion de mon registrament sota licéncia CC BY 4.0.
Leis audios se publican sota licéncia Creative Commons Attribution 4.0. Lei metadonadas consèrvan lo locutor, lo consentiment, la data, la licéncia e l’objècte OSM concernit. Fau enregistrar sa pròpria votz ò dispausar dau consentiment clar dau locutor.
Un verificator pòt validar ò escafar un audio. Un audio validat se pòt escotar sus la ficha de l’objècte. Un audio escafat se tira dau sauvament, mai l’accion de moderacion demòra dins l’istoric intèrne.
Un mandadís futur d’audios seleccionats vèrs Wikimedia Commons se pòt estudiar. Demandarà una seleccion, de metadonadas adaptadas, lo respècte dei règlas de Commons e, segon lei cas, un liame amb Wikidata. Aqueu mandadís se fa pas automaticament dins la V1.
Administracion
L’administrator pòt crear, copiar, activar ò desactivar un tèma. Dins cada tèma, pòt crear mai d’una balisa e configurar son aparéncia, sa requèsta, sei zooms e son formulari. Lei tèmas inactius figuran dins l’administracion, mai apareisson pas dins l’acuelh.
Lei cambiaments non sauvats son senhalats. Una còpia de configuracion se pòt cargar, verificar, sauvar puei. L’administrator pòt tanben atribuir leis estatuts contributor, verificator e administrator.
Lei contributors connectats pòdon mandar un messatge a l’administrator. L’administrator pòt marcar un messatge coma legit ò l’escafar.
Donadas conservadas
OpenStreetMap conserva:
- lei tags mandats;
- l’autor dau cambiament;
- lo changeset;
- l’istoric public de l’objècte.
GeoOccitania consèrva a despart:
- la configuracion dei tèmas, balisas e formularis;
- leis estatuts deis utilizators;
- la traça dei contribucions escrichas;
- lei fichièrs e metadonadas audio;
- lei consentiments;
- leis estats e accions de verificacion;
- lei messatges intèrnes;
- lei tèmas favorits.
Lei tokens d’accès OSM son de secrets de session. Se devon jamai afichar, publicar, inclure dins un expòrt administratiu nimai escriure dins un jornau public.
Expòrts e sauvagardas
L’administrator pòt descargar:
- lei contribucions e metadonadas en CSV ò JSON;
- una còpia de la configuracion;
- una còpia dei taulas de la basa.
La còpia de la basa contèn lei metadonadas audio, mai remplaça pas una còpia dei fichièrs. Una sauvagarda completa deu comprendre la basa, l’espaci audio e la configuracion. Lei còpias regularas se devon conservar dins un autre espaci e s’assajar periodicament amb una restauracion.
Arquitectura tecnica
GeoOccitania agropa:
- una interfàcia web amb una mapa resquilhanta;
- de requèstas vèrs Overpass;
- una autenticacion OAuth 2 OSM;
- una API de contribucion OSM;
- una basa per lei metadonadas e lo workflow;
- un espaci d’objèctes per leis audios;
- d’interfàcias de verificacion, administracion e expòrt.
Lei servicis exteriors son OpenStreetMap, Overpass e lei servicis de jaças OSM/OSM-oc. Una indisponibilitat d’un d’aquelei servicis pòt limitar una fonccion sensa rendre lei donadas intèrnas publicas.
Installacion e desplegament
Una installacion novèla demanda:
- un còdi recuperat dins un espaci de trabalh protegit;
- lei dependéncias dau programa;
- una basa amb sei migracions;
- un espaci de sauvament per leis audios;
- una aplicacion OAuth 2 enregistrada sus OpenStreetMap;
- una adreiça de retorn OAuth que correspond au site;
- lei secrets definits dins l’interfàcia segura de l’aubergador;
- una construccion verificada abans lo desplegament;
- d’assais de connexion, Overpass, mandadís OSM, audio, verificacion e expòrt.
La documentacion publica pòt nomar lei paramètres necessaris, mai deu emplegar ren que de valors fictivas. Se devon jamai publicar:
- lo secret OAuth OSM;
- un token d’accès;
- un identificant de session;
- una clau d’API;
- una clau d’accès a la basa ò ais audios;
- una còpia de basa que contèn de donadas personalas.
Lei secrets reaus se definisson dins l’espaci protegit de l’aubergador, jamai dins un repertòri Git, una captura d’escran, un jornal public ò aquesta pagina.
Limits de la V1
- Overpass pòt respòndre lentament ò èstre indisponible.
- Lei requèstas tròp largas pòdon fracassar.
- La geolocalizacion e lo microfòn dependon deis autorizacions dau navigator.
- Leis audios son exteriors a OpenStreetMap.
- La V1 web es pas encara una aplicacion installabla ò nativa.
- Lei salvaments OSM e GeoOccitania son separats.
- La configuracion d’una balisa demanda una conoisséncia minimala d’Overpass QL e dei tags OSM.
Desvelopaments possibles
- una guida illustrada amb de capturas d’escran e de legendas;
- de versions cortas de formacion;
- de shorts e reels de presentacion;
- una aplicacion installabla ò nativa;
- una estrategia de publicacion d’audios seleccionats sus Wikimedia Commons;
- de liames amb Wikidata;
- l’automatizacion dei còpias e deis assais de restauracion;
- d’estatisticas agregadas amb respècte dei donadas personalas.